राज्य सरकारने 18 जिल्ह्यांचा दुष्काळसदृश यादीत समावेश केला असला, तरी बुलढाणा जिल्ह्याला वगळण्यात आल्याने शेतकरी नेते रविकांत तुपकर आक्रमक झाले आहेत. “एसी केबिनमध्ये बसून दुष्काळ ठरवू नका, शेतकऱ्यांच्या बांधावर येऊन परिस्थिती पाहा,” अशा शब्दांत त्यांनी सरकारला सुनावले. बुलढाण्यात कोरडा दुष्काळ जाहीर करून नुकसानग्रस्त शेतकऱ्यांना हेक्टरी 1 लाख रुपये मदत द्यावी, अन्यथा तीव्र आंदोलनाचा इशाराही त्यांनी दिला आहे.
बुलढाणा जिल्ह्यातील मेहकर ग्रामीण रुग्णालयापासून अवघ्या ५० मीटर अंतरावर एका महिलेची रस्त्यावरच प्रसूती झाल्याचा धक्कादायक प्रकार समोर आला आहे. प्रसूतीच्या गंभीर अवस्थेत महिला मदतीसाठी तडफडत असताना रुग्णालयातील स्टाफ नर्सने बाहेर येण्यास नकार दिल्याचा आरोप करण्यात आला आहे. अखेर स्थानिक नागरिकांनी प्रसंगावधान राखत खासगी रुग्णालयातील नर्सच्या मदतीने महिलेची प्रसूती केली. आई आणि बाळाला पुढील उपचारासाठी खासगी रुग्णालयात दाखल करण्यात आले.
बुलढाण्यातील संग्रामपूर तालुक्यात करमोडा ग्रामपंचायतीचे सरपंच दीपक प्रकाश उगले यांचा शेतात मृत्यू झाला. मृत्यूपूर्वी त्यांनी व्हिडीओ प्रसारित करून राजकीय विरोधकांच्या धमक्या व त्रासाचा आरोप केल्याची माहिती आहे. पोलिसांनी तपास सुरू केला असून, व्हिडीओतील आरोप आणि मृत्यूमागील नेमके कारण तपासले जात आहे.
Sukanya Perane
